माघ ९ । नेपाल कम्युनिस्ट पार्टी (नेकपा)ले आज काठमाडौंमा विरोध प्रदर्शन र सभा आयोजना गरेको छ ।
प्रधानमन्त्री केपी शर्मा ओलीको संसद् विघटनको कदमविरुद्ध पुष्पकमल दाहाल ‘प्रचण्ड’ र माधवकुमार नेपाल समूहले प्रदर्शन गरेको हो । काठमाडौं उपत्यकाकेन्द्रित ठूलो सभा आयोजना गरिएको हो ।
यसका लागि उपत्यकामा विभिन्न १० स्थानबाट जुलुस निकालिएको छ । जुलुस बसपार्कअगाडि पुगेर सभामा परिणत हुँदै छ । जुलुसको नेतृत्व स्थायी कमिटी सदस्यहरूले गरेका छन् ।
सभालाई अध्यक्षद्वय प्रचण्ड, नेपाल, घनश्याम भुसाललगायतले सम्बोधन गर्ने बताइएको छ ।
गएको पुस १४ गते राष्ट्रियसभा गृहअघिल्तिर सभाको आयोजना गरिएको थियो । त्यसो हुँदा प्रदर्शनीमार्गको बाटो अवरूद्ध हुन पुगेको थियो । यसपटक रत्नपार्क–भद्रकाली सडकखन्डको मूल सडक नै थुनेर सभा आयोजना गरिएको छ ।