२२ फागुन । चितवनमा लागुऔषध गाँजासहित तीनजना पक्राउ परेका छन् । भरतपुर महानगरपालिका ११ स्थित जखेडीमाई मन्दिर नजिकै प्रहरी बिट गणेशधामबाट खटिएको प्रहरी टोलीले चार किलो गाँजासहित तीन जनालाई पक्राउ गरेको हो ।
पक्राउ पर्नेहरुमा भरतपुर २ बेलटाँडीका २९ वर्षीय श्याम थापा क्षेत्री, सोही स्थानका ३२ वर्षीय टेकेन्द्र राजवंशी र इच्छाकामना गाँउपालिका ७ का भीमराज गुरुङ रहेका छन् । बिहीबार साँझ ६ बजे सिमलढापबाट भोजाडतर्फ आउँदै गरेको वाग्मती प्रदेश ०३–००१ प १९२ नम्बरको मोटरसाइकल र ना५४प ३६०८ नम्बरको मोटरसाइकललाई चेकजाँच गर्ने क्रममा उनीहरुलाई पक्राउ गरिएको जिल्ला प्रहरी कार्यालय चितवनले जानकारी दिएको छ । बिहीबारदेखि नै लागू हुनेगरी उनीहरुलाई चितवन जिल्ला अदालतबाट पाँच दिनको म्याद थप गरी अनुसन्धान अघि बढाइएको छ ।