२० फागुन। नेपाल भलिबल संघको आयोजनामा पाँचौं आरबीबी एनभीए महिला तथा पुरुष राष्ट्रिय क्लब लिग भलिबल चैत १९ देखि २६ गतेसम्म आयोजना हुने भएको छ ।
संघले बिहीबार पत्रकार सम्मेलन गर्दै प्रतियोगिता आयोजना गर्ने मिति सार्वजनिक गरेको हो । लिग काठमाडौंमा हुनेछ । लिगमा पुरुषतर्फ ८ र महिलातर्फ ६ टिमले प्रतिस्पर्धा गर्नेछन् ।
गत वर्ष चैतदेखि कोरोना महामारीले गर्दा लकडाउन भएपछि लिग एक वर्ष पछि हुन लागेको हो ।
गत वर्ष माघमा भएको एनभीए क्लब भलिबल च्याम्पियनसीपबाट उत्कृष्ट ८ पुरुष टिम र उत्कृष्ट ६ महिला टिम छनोट भएको हो ।
लिगमा पुरुषतर्फ २८ र महिलातर्फ १५ गरि कुल ४३ खेल हुनेछ । सिंगल लिगपछि शीर्ष दुईमा रहने टिमले फाइनल खेल्नेछन् ।
यस पटक खेलाडी र अफिसियलहरुको इन्सुरेन्स पनि गरिने संघका महासचिव जितेन्द्र चन्दले जानकारी दिए ।
प्रतियोगिताको विजेता महिला र पुरुषले ३ लाख हात पार्नेछन् । यस्तै उपवपजेताले १ लाख ५० हजार, तेस्रोले ७५ हजार र चौथो हुनेले ३७ हजार ५ सय पाउनेछन् ।
सर्वोत्कृष्ट खेलाडीले २५-२५ हजार पाउनेछन् भने उत्कृष्ट लिब्रो, स्पाइकर, ब्लकर, सर्भर, सेटर र प्रशिक्षकले १०-१० हजार रुपैयाँ प्राप्त गर्नेछन् ।
लिगको अनुमानित बजेट २८ लाख रहेको छ । लिगको मुख्य प्रायोजकमा राष्ट्रिय वाणिज्य बैँक रहेको छ ।
