१७ फागुन । इटालियन सिरी एमा दुवै मिलान क्लब विजयी भएका छन् । शीर्ष स्थानको इन्टर र दोस्रो स्थानको एसी मिलानले जित हात पार्दै उपाधि होडमा आफूलाई अगाडि राखेका छन् ।
आइतबार राति भएको खेलमा इन्टरले जेनोअलाई ३-० ले हरायो । इन्टरका लागि रोमेलु लुकाकले खेलको पहिलो मिनेटमै गोल गरे । यस्तै माटेओ डार्मिनले ६९औं र एलेक्सिस सान्चेजले ७९औं मिनेटमा गोल गरे ।
यस्तै अर्को खेलमा एसी मिलानले रोमालाई २-१ ले हरायो । रोमाको मैदानमा भएको खेलको ४३औं मिनेटमा फ्रान्स केसीले पेनाल्टीमा गोल गर्दै मिलानलाई पहिले अग्रता दिलाएका थिए । ५०औं मिनेटमा जोर्डन भेरेटाउटले रोमाको लागि बराबरी गोल फर्काए । तर ५८औं मिनेटमा एन्टे रेबिकले गोल गर्दै एसी मिलानलाई जित दिलाए ।
जितपछि इन्टरको २६ खेलबाट ५६ अंक छ । समान खेलबाट ५२ अंक जोड्दै एसी मिलानले अंक दूरी ४ मा झारेको छ । रोमा २४ खेलबाट ४४ अंकसहित पाँचौ स्थानमा छ ।