१५ फागुन । हात्तीको आक्रमणबाट स्पेनको एक चिडियाघरमा कार्यरत कर्मचारीको ज्यान गएको छ। ४४ वर्षीय जोक्वीन अर्नेज नामक ती व्यक्तिलाई हात्तीसार सफा गर्ने क्रममा हात्तीले आक्रमण गरेको थियो। चार हजार किलोको अफ्रिकन पोथी हात्तीले अर्नेजलाई सुँडले उचालेर बारतिर हुत्याइदिएका थिए।
त्यसपछि अर्नेज घाइते भए। उनलाई तुरुन्तै अस्पताल लगियो। तर त्यहाँ पुग्दा उनको मृत्यु भइसकेको थियो। बुधवार भएको घटनाको समयमा अरु कार्मचारी पनि हात्तीसारमा सफाइमा खटिएका थिए।
स्थानीय प्रहरीले घटनाको थप अनुसन्धान गरिरहेको जनाएको छ। स्पेनका पर्यटनमन्त्री फ्रान्सिस्को जेभियर लोपेज मर्कानोले हात्तीको खुट्टामा इन्फेक्सन भएको र उक्त हात्ती गर्भवती भएको हुनसक्ने अनुमान गरेका छन्। चिडियाखानाको ३० वर्षे इतिहासमा यो नै पहिलो घातक घटना भएको उनले बताएका छन्।