माघ २० । नायिका करिष्मा मानन्धर नयाँ चलचित्र निर्माण गर्ने तयारीमा जुटेकी छिन् । उनले निर्माण गर्न लागेको चलचित्रको नाम ‘बनवास’ हुने छ ।
उक्त चलचित्र निर्माणका लागि अहिले स्क्रिप्टको काम भइरहेको छ । “मलाई सुशिल क्षेत्रीले कथाको प्ल्ट सुनाउँदा राम्रो लाग्यो । त्यसैले यसमा चलचित्र बनाउनु पर्छ भनेर काम सुरु भएको हो । अहिले स्क्रिप्ट लेख्ने काम भइरहेको छ,” करिष्मा बाह्रखरीसँग भन्छिन्, “पहिलो चरणको स्क्रिप्ट राइटिङ सकिए पछि वैशाखमा रिभ्यू र रिराइट हुने छ । त्यसपछि असार साउनतिर फ्लोरमा जाने अहिलेसम्मको योजना हो ।”
अहिले स्क्रिप्ट लेखिरहेका सुशिल स्वयंले चलचित्र निर्देशन गर्ने करिष्मा बताउँछिन् । सुशिल सिनेमेटोग्राफर हुन् ।
‘बनवास’मा मुख्य भूमिकामा कविता मानन्धर रहने छिन् । कविता करिष्मा कि छोरी हुन् । कविताको अपोजिटमा को रहने छ, त्यो भने निश्चित नभइसकेको करिष्मा बताउँछिन् ।
माघ १ गते रिलिज भएको चलचित्र ‘एउटा यस्तो प्रेम कहानी’मा पनि कविताको अभिनय रहेको थियो । यो उनको डेब्यू चलचित्र हो ।