माघ १५ । महानगरीय ट्राफिक प्रहरी महाशाखाले बिहीबार काठमाडौंका कृष्णपाउरोटी चोक र गैह्रीधारामा नयाँ ट्राफिक लाइट जडान गरी सञ्चालनमा ल्याएको छ ।
महाशाखाले कृष्णपाउरोटी चोकमा प्राइम कमर्सियल बैंक र गैह्रीधारामा सनराइज बैंकसँग समन्वय गरी नयाँ ट्राफिक लाइट जडान गरेको हो ।
‘‘काठमाडौं उपत्यकामा भइरहेको चाप, सवारी दुर्घटना तथा अन्य ट्राफिक समस्या समाधानको लागि प्रविधिको विकास र प्रयोगलाई प्राथमिकता दिइँदै आएको छ । ट्राफिक व्यवस्थापनलाई प्रविधितर्फ लैजाने प्रयासमा छौँ । यसको लागि सडक विभागबाहेक स्थानीय निकाय, विभिन्न बैंक, वित्तीय संघ–संस्थाहरुसँग निरन्तर समन्वय, सहकार्यमा काम हुँँदै आएको छ,’’ महाशाखाका प्रमुख प्रहरी वरिष्ठ उपरीक्षक जनक भट्टराईले ।
प्राइम बैंककी एसिस्टेन म्यानेजर अनिता प्रधानले लाइटले सहयोगी भूमिका खेल्ने र आगामी दिनहरुमा समेत ट्राफिक महाशाखासँग सहकार्य गर्ने बताइन् ।
सनराइज बैंकका सीईओ जनक पौडेलले ट्राफिक लाइटको प्रयोगले ट्राफिक व्यवस्थापन र दुर्घटना न्यूनीकरणमा महत्वपूर्ण भूमिका खेल्ने बताए ।
महाशाखाले काठमाडौं उपत्यकाका मुख्य–मुख्य ३० वटा चोकमा ट्राफिक लाइटबाट ट्राफिक व्यवस्थापन गर्दै आएको छ ।
