माघ १३ । सुनका गरगहनासमेतका धनमाल लुटपाटमा संलग्न रहेको आरोपमा काठमाडौंबाट दुईजना पक्राउ परेका छन् ।
पक्राउ पर्नेहरुमा दरबारमार्गस्थित आँधीखोला दोहोरी साँझमा काम गर्ने बझाङको जयपृथ्वी नगरपालिका–१ घर भई काठमाडौंको नयाँबानेश्वर बस्ने २१ वर्षीय सुनीलबहादुर सिंह र सोही दोहोरी साँझमा चालकको काम गर्ने सिन्धुपाल्चोकको साँगाचोकगढी घर भई हाल काठमाडौंको कोटेश्वर बस्ने ३४ वर्षीय कृष्णबहादुर श्रेष्ठ रहेका छन् ।
काठमाडौंको स्युचाटार बस्ने ४२ वर्षीय पुरुषको माघ १० गते राति धनमाल लुटपाट भएको घटनाको अनुसन्धानको क्रममा घटनामा संलग्न उनीहरुलाई प्रहरीले पक्राउ गरेको हो । उनीहरुबाट सवा तीन तोलाको एकथान सुनको सिक्री, करिब दुई तोलाको एकथान सुनको औँठी, हात्तीको पुच्छर भएको करिब साढे एक तोलाको एकथान सुनको ब्रासलेट र उक्त दोहोरी साँझको बा३च ६६४९ नम्बरको मारुती कार प्रहरीले बरामद गरेको छ ।
