२७ पुष चितवन राष्ट्रिय निकुञ्जभित्रको बाटो कालोपत्रे हुने भएको छ । निकुञ्जको बाटो कालोपत्रे गर्न निर्वाचन क्षेत्र बिकास कोषबाट ४ करोड रुपैँया बिनियोजन भएको माडी नगरपालिका नगर प्रमुख ठाकुर प्रसाद ढकालले बताउनुभयो । क्षेत्र बिकाश कोषको ४ करोड रकम तथा अन्य लगानी माडी नगरपालिकाले गर्ने गरी आँउदो असार मसान्तबाट काम गर्ने तयारी गरिएको उहाँले जानकारी दिनुभयो ।
“निकुञ्जभित्रको बाटो कालोपत्रेमा लागि काम सुरुवात गर्ने बिषयमा निकुञ्जका वार्डेनसमेत उपस्थितीमा छलफल भएको छ” उहाँले भन्नुभयो । कालोपत्रेका लागि दुई देखि ३ महिना माडी नगरपालिकाका रोलर, ग्रेडरलगायतका सबै उपकरणको प्रयोग गरिने उहाँले बताउनुभयो । निकुञ्जभित्रको बाटो कालोपत्रे र बाटो २४ औँ घण्टा खुल्ला राख्ने सन्दर्भमा बनमन्त्रीलाई भेटेको बताउनुहुदैँ नेकपा अध्यक्ष पुष्पकमल दाहाल “प्रचण्ड” समेत यस बिषयमा सकारात्मक रहनुभएको जिकिर गर्नुभएको हो ।
यस योजनामा रोकावट हुन सक्ने कानुनी व्यबस्था रहे प्रधानमन्त्रीले संसोधन गरेर माडीबासीलाई बिकासको प्रत्याभुति गर्न सक्ने वातावरण बनाईनु पर्ने बिचार राख्नुभएको थियो ।
साथै, मेयर ढकालले बर्तमान राजनैतिक स्थितीका कारण बिनियोजित बजेटहरु फ्रिज हुने गरी सरकार अगाडी बढे योजना सफल हुन नसक्ने शंका व्यक्त गर्नुभयो । यस योजनामा यसखाले कुनै पनि क्रियाकलाप भएमा माडीका सबै जनाता लिएर आन्दोलनमा जुट्नुको बिकल्प हुनेछैन उहाँले थप्नुभयो ।