पौष २७। झापा र कैलालीमा भएको सवारी दुर्घटनामा २ जनाको मृत्यु भएको छ ।
झापाको कन्काई नगरपालिका–७, स्थित सडकमा बा८०प ७६५ नम्बरको मोटरसाइकलको ठक्करबाट पैदलयात्री दोलखा, कालिञ्चोक–८ घर भएका ८० वर्षीय खेन्द्र शिवाकोटीको मृत्यु भएको हो । गम्भीर घाइते भएका उनको बीएन्डसी अस्पताल बिर्तामोडमा उपचारको क्रममा मृत्यु भएको हो ।
दुर्घटनामा घाइते भएका मोटरसाइकल चालक झापा, बिर्तामोड नगरपालिका–५ बस्ने २० वर्षीय किरण थापा र मोटरसाइकलमा सवार सोही नगरपालिका–७ बस्ने १५ वर्षीय प्रवेश महमतको सोही अस्पतालमा उपचार भइरहेको छ ।
यस्तै, कैलालीको टीकापुर नगरपालिका–१, लम्कीपुलस्थित सडकमा भे१त ५५०६ नम्बरको ट्याक्टरको ठक्करबाट साइकलयात्री सोही ठाउँस्थित बनगाउँ बस्ने ३७ वर्षीया सरुपा तिवारी जैसीको मृत्यु भएको छ । ठक्करबाट गम्भीर घाइते भएकी उनको टीकापुर अस्पताल हुँदै कोहलपुर मेडिकल कलेज बाँकेमा थप उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ ।