पौष १३ । कोभिड–१९ संकट व्यवस्थापन संचालन केन्द्र सीसीएमसीले चलचित्र क्षेत्रलाई राहत प्याकेज उपलब्ध गराउन सरकारसँग आग्रह गरेको छ ।
कोरोनाका कारण लामो समय ठूलो समस्यामा परेका होटल, पर्यटन, हवाई उडानलगायत विभिन्न क्षेत्रलाई सरकारले राहत प्याकेज उपलब्ध गराए पनि चलचित्र क्षेत्र छुटेको भन्दै आवश्यक संबोधन गर्न सीसीएमसीले अर्थ मन्त्रालयलाई आग्रह गरेको हो ।
चलचित्र विकास बोर्ड र चलचित्र संघले आग्रह गरे अनुसार अर्थ मन्त्रालयलाई आवश्यक निर्णयका लागि सीसीएमसीले अर्थ मन्त्रालयलाई पत्र लेखेको हो । बोर्ड र संघले चलचित्र क्षेत्रलाई कोरोना अति प्रभावित क्षेत्रमा राख्न तालुकदार मन्त्रालय सञ्चार मन्त्रालय र अर्थ मन्त्रालयसँग माग गरेको थियो ।
चलचित्र संघका अध्यक्ष आकाश अधिकारीले आफूले केही दिन अगाडि अर्थ मन्त्री विष्णु पौडेललाई भेटेर चलचित्र क्षेत्रलाई अति प्रभावित क्षेत्रमा राख्न आग्रह गरेका थिए । उक्त भेटमा मन्त्री पौडेलले आफूलाई चलचित्र क्षेत्र सरकारले उपलब्ध गराएको राहत तथा सुविधा कार्यक्रमबाट छुटेको महसुस गरेको बताएका थिए ।
