पौष १२ । जनता समाजवादी पार्टी जसपा का नेता अशोक राईले संसद् विघटन र चुनाव घोषणामार्फत केपी ओलीले संविधानमाथि खड्ग प्रहार गरेको बताएका छन् । जसपाको विरोधसभालाई सम्बोधन गर्दै नेता राईले ओलीको यो प्रहारमा खड्गवादीबाहेक कसैको पनि समर्थन नरहने दाबी पनि गरे ।
नेता राईले भने, “प्रतिनिधिसभा विघटन गर्ने र चुनावको आयोजना गर्ने निर्णय संविधानविपरीत छ, असंवैधानिक छ, त्यसै कारण आज सम्पूर्ण नेपाली जनता र राजनीतिक दल संविधानमाथि खड्ग प्रहार गर्नेबाहेक सारा सडकमा छन्, हजारौं सहिदको रगतबाट लेखिएको संविधानलाई हल्का ढंगबाट समाप्त पार्ने प्रयास भएको छ ।” उनले संविधानमा केही कमजोरी रहेको र संघीयताको भावना र नेपाली जनताको चाहनाअनुरुप भने बनाउन बाँकी रहे पनि त्यसलाई संशोधन गर्ने मात्र आफूहरुको माग रहेको भन्दै ओलीले संविधानको मर्ममै प्रहार गरेर सिध्याउने प्रयास गरेको बताए ।

“एउटा व्यक्तिको चाहना पूरा गर्न संविधानमा धावा बोलिएको छ, संविधानको चिरहण गरिएको छ,” राईले भने, “यसलाई सच्याउने पुनस्स्थापित गर्ने एउटा मात्र बाटो संसद्‍को पुनस्स्थापना हो ।”