रुस–युक्रेनबीचको युद्धमा परेर दुई युक्रेनी फुटबलरको निधन भएको छ । अन्तर्राष्ट्रिय व्यावसायिक फुटबलर्स महासङ्घ (एफआइएफपिआरओ) ले युद्धमा परेर दुई फुबटलरको निधन भएको पुष्टि गरेको छ ।
युक्रेन युद्धले रुसजस्तो शक्तिशाली राष्ट्रसँग डटेर युद्ध गरिरहेको छ । रुसले युक्रेनमाथि जल, थल र आकाश तीनैतिरबाट आक्रमण गरेको छ । जसका कारण अहिलेसम्म युक्रेनबाट हजारौँको सङ्ख्यामा युक्रेनीहरू छिमेकी देशहरूमा शरण लिइरहेका छन् भने धेरैको मृत्युको खबर आइरहेको छ ।
यस्तैमा, युक्रेनमा दुई फुटबलको पनि निधन भएको भन्दै एफआइएफपिआरओले दुःख प्रकट गरेको छ । उसका अनुसार २१ वर्षीय फुटबलर भिटाली साप्ल्यो र २५ वर्षीय डिमित्रो मार्टिनेन्कोको निधन भएको हो ।
स्याप्ल्यो कर्पापी लिभ युथ टिमबाट फुटबल खेल्थे । उनको मृत्यु गत शुक्रबार भएको बताइएको छ । यस्तै, एफसी गोस्टोमेलबाट फुटबल खल्ने गरेका मार्टिनेन्को पनि युद्धमा परेर निधन भएको जनाइएको छ । मार्टिनेन्कोको घरमा रसियन सैनिकले बम फ्याँकेपछि उनी त्यसको सिकार बनेका थिए ।
