१० फागुन । गत वर्ष नेपाल सरकारले घोषणा गरेको नेपालको घुम्नै पर्ने १०० पर्यटकीय गन्तव्यभित्रको सूचीमा छनोट भएको मुन्धुम पदमार्गको निर्माण कार्य धमाधम भइरहेको छ ।
स्थानीय सरकार, प्रदेश सरकार र स्वीस सरकारको लगानीमा मुन्धुम पदमार्गको करिब २५ किलोमिटर निर्माण कार्य सम्पन्न भएको छ । ८८ किलोमिटर निर्माण गर्ने योजनासहित काम भइरहेको छ ।
स्थानीय आर्थिक विकासको लागि मुन्धृुम पदमार्ग पर्यटन प्रवर्द्घन परियोजना अन्र्तगत निर्माण भइरहेको संयोजक हिराबाबु थापाले बताए ।
उनका अनुसार अहिले पदमार्ग फराकिलो बनाउने, सिँढी बनाउने, चौतारा बनाउने, किराँत पहिचानसँग जोडिएका चीहरुको सम्बर्धन एवम् प्रवर्धन गर्ने, साइनबोर्ड राख्ने कार्य भइरहेको बताए ।
मुन्धुम ट्रेल अन्तर्गत भोजपुरको टेम्केमैयुङ गाउँपालिका, सालपा सिलिचो गाउँपालिका, षडानन्द नगरपालिका, भोजपुर नगरपालिकाका र खोटाङको साकेला गाउँपालिका, केपिलासगढी गाउँपालिकाको भूगोलमा पर्दछ ।
मुन्धुम ट्रेल किराँती संस्कार, संस्कृति र जीवनशैलीमा आधारित छ । किराँतीहरुले मुन्धुमको आधारमा जन्मदेखि मृत्युसम्मको क्रियाकलाप गर्ने परम्परा रहेको र यसैलाई आधार मानेर पदमार्गको रुपमा विकासित गरिएको मुन्धुम ट्रेल पावीहाङ राईले बताए । यो पदमार्ग विभिन्न किराती समुदायको बसोबास गर्ने ठाउँहरुमा भएकाले विभिन्न किराती संस्कृति, संस्कार र जीवनशैली झल्किने निमार्ण कार्य भइरहेको राईले बताए ।
यो पदमार्गबाट सगरमाथा, कञ्चनजङ्घा, मकालु, ल्होत्सेलगायतका आठ हजार मिटर अग्ला छ वटा हिमाल देख्न सकिने उनले बताए । यसबाहेक नेपालको अन्य कुनै ट्रेकिङ रुटबाट नदेखिने ४५ वटा हिमश्रृफ्ला देख्न सकिन्छ । तराईका भू(भागहरु समेत अवलोकन गर्न सकिने छ ।
