पेरिस सेन्ट जर्मेन (पीएसजी) फेरि पराजित भएको छ । फ्रेन्च लिग वानको शीर्ष स्थानमा रहेको पीएसजी आइतबार राति घरेलु मैदान पार्क डे प्रिन्समा लियोनसँग १– ० ले पराजित भएको हो ।
लियोनको जितमा ब्राडली बार्कोलाले ५६औं मिनेटमा निर्णायक गोल गरे । त्यसअघि अलेक्जान्डर लाकाजेटले पहिलो हाफमा प्रहार गरेको पेनाल्टी पोष्टमा लागेको थियो ।
पीएसजीका सर्वाधिक गोलकर्ता किलिएन एमबाप्पेले बराबरी गोल नजिक पुगे पनि उनको प्रहार सेभ भएको थियो । पीएसजीले पछिल्लो १८ मध्ये ७ खेलमा पराजित भएको छ ।
हारपछि पनि पिएसजी लिगको शीर्ष स्थानमा छ । २९ खेलबाट ६६ अंकका साथ पीएसजी दोस्रो स्थानको लेन्स भन्दा ६ अंकले अघि रहेको छ । लियोन २९ खेलबाट ४४ अंक जोडेर नवौं स्थानमा छ ।
