नेपाली काङ्ग्रेस प्रदेश १ को संसदीय दलका नेता छनोटका लागि शुक्रबार निर्वाचन हुँदैछ । दलको नेताका दाबेदारहरुले दाबी नछाडेपछि मतदानबाट नेता छान्न निर्वाचन तोकिएको हो ।
निर्वाचनको अगाडि कांग्रेस नेता डाक्टर शेखर कोइरालाले सबै पक्षलाई मिलाउने प्रयास गरेका छन् । बिहीबार आफ्नो निवासमा निर्वाचित सांसदलाई बोलाएर डाक्टर कोइरालाले मिलाउने प्रयास गरेका हुन् । तर उनकाे प्रयास सफल भएन ।
कांग्रेस प्रदेश १ संसदीय दलको नेतामा सभापति शेरबहादुर देउवा पक्षबाट अमृत अर्याल दलको नेताको दाबेदार छन् । डाक्टर शेखर कोइरालाको टिमबाट केदार कार्की दाबेदार छन् । कृष्णप्रसाद सिटौलाको टिमबाट प्रदेश सभापति उद्धव थापा दलको नेताको दाबेदार हुन् । सिटौलाको टिमबाट यसअघि भीम पराजुली पनि दाबेदार थिए । तर उनी पछिल्लो समय ब्याक भएका छन् ।
कांग्रेसका निर्वाचित सांसदलाई बधाई दिन भन्दै नेता कोइरालाले घरमा बोलाएका थिए । घरमा करिब एक घण्टा छलफल गरेका थिए ।
