दक्षिण कोरियाको राजधानी साेलको एक जिल्लामा भएको भागदौडमा मृत्यु भएका १५० मध्ये करिब ५० जनाको हृदयाघात भएको आशंका गरिएको स्थानीय सञ्चारमाध्यमले जनाएका छन्।
स्थानीय प्रसारक वाईटीएनका अनुसार साेलको रात्रिकालीन पर्यटकीय गन्तव्य इटेवोनमा रहेको एक बारमा एक अज्ञात सेलेब्रिटीको कार्यक्रम हेर्न ठूलो संख्यामा भीड जम्मा भएको समय भागदौड मच्चिएको थियो।
योनहाप समाचार संस्थाका अनुसार स्थानीय समयअनुसार राति ११:३० बजे हेलोवीन उत्सवको क्रममा भागदौड मच्चिएपछि करिब ५० जनाको हृदयाघात भएको थियो।
श्वास प्रश्वासमा समस्या भएका ८१ जनालाई उद्धार गरिएको अग्निनियन्त्रक अधिकारीले सरकारलाई दिएको एक रिपोर्टमा उल्लेख गरिएको छ।
उद्धारकर्मीलाई ‘कार्डियोपल्मोनरी’ उपचारका लागि तत्काल घटनास्थलमा पठाइएको सञ्चारमाध्यमहरूले बताएका छन्।
