सुन्दरी प्रतियोगिताका क्रममा जबरजस्ती करणी गरेको अभियोग लागेका मनोज पाण्डेलाई पुर्पक्षका लागि थुनामा पठाउन जिल्ला अदालत काठमाडौंले आदेश दिएको छ ।
आठ वर्षअघि भएको सौन्दर्य प्रतियोगिताकी प्रतिष्पर्धीलाई जबरजस्ती करणी गरेको अभियोग लागेका पाण्डेलाई न्यायाधीश प्रकाश ढुङ्गानाको इजलासले थुनामा पठाउने आदेश दिएको हो । पाण्डेविरुद्ध मानव बेचबिखन तथा ओसारपसार मुद्दा दायर गरिएको छ । पाण्डेले यौन दुरुपयोग गरेको लगायत आरोप लगाइ मुलुकी अपराध संहिता ऐन, २०७४ को परिच्छेद (१८) को बाल यौन दुरुपयोग गर्न नहुने कसुरमा २०७९ साल जेठ ८ गते उजुरी दायर भएको थियो ।
पाण्डेले विभिन्न बहानामा होटल तथा विभिन्न स्थानमा बोलाई नशालु पदार्थ पिलाई बेश्याबृत्तिमा लगाउने गरेको लगायत आरोप जाहेरीकर्ताले लगाएकी छन् । गत जेठमा घटना सार्वजनिक भएपछि उनलाई प्रहरीले पक्राउ गरेको थियो ।
हदम्यादका कारण जबरजस्ती करणीमा मुद्दा दर्ता गर्न सम्भव नभएपछि उनी विरुद्ध मानव बेचबिखन तथा ओसारपसारको मुद्दा लगाइएको थियो । जेठ ७ गते काठमाडौंको स्वयम्भूबाट पक्राउ परेका उनलाई डिल्लीबजार कारागारमा राखिएको छ ।
