उद्योग, वाणिज्य तथा आपूर्तिमन्त्री दिलेन्द्रप्रसाद बडुले पेट्रोलियम पदार्थको मूल्यवृद्धि फिर्ता लिने विषयमा चाँडै निर्णय गरिने बताएका छन् ।
मूल्यवृद्धि फिर्ताको मागसहित मन्त्रीसँग भेटेका विद्यार्थी संगठनलाई उनले यस्तो बताएका हुन् । मंगलबार सरकारआबद्ध नेपाल विद्यार्थी संघ, अनेरास्ववियु, अनेरास्ववियु (क्रान्तिकारी)लगायत १५ विद्यार्थी संगठनले ध्यानाकर्षण पत्र बुझाएपछि मन्त्री वडुले उक्त जानकारी दिएका हुन् ।
विद्यार्थी संगठनले आजसम्म मूल्यवृद्धि फिर्ता गर्नुपर्ने बताएका थिए । मन्त्री वडुले मूल्यवृद्धिको विषयमा चाँडै निर्णय गर्ने प्रतिबद्धता व्यक्त गर्दै विद्यार्थी संगठनलाई आन्दोलन नगर्न आग्रह गरेका हुन् ।
अनेरास्ववियुकी अध्यक्ष सुनिता बरालका अनुसार मन्त्री वडुले विद्यार्थीलाई ग्यासमा सहुलियत दिने र पेट्रोलियम पदार्थमा कर फिर्ता लिने विषयमा चाँडै नै सरकारले निर्णय गर्ने प्रतिबद्धता जनाएका छन् ।
