नयाँ दिल्ली । बलिउड अभिनेत्री कंगना रनौतले भारतीय कांग्रेसकी अन्तरिम अध्यक्ष सोनिया गान्धीसँग सहयोगी पार्टी शिवसेनालाई संविधानको पालना गराउन आग्रह गरेकी छन् ।
महाराष्ट्र सरकारसँगको गहिरिँदो विवादलाई लिएर अभिनेत्री कंगनाले सोनियासँग सहयोगी पार्टी शिवसेनालाई संविधानको पालना गर्नका लागि भन्न आग्रह गरेकी हुन् ।
कंगनाले ट्विटरमा सोनियाँ गान्धीलाई प्रश्न गरेकी छन्, “आदरणीय कांग्रेस अध्यक्ष सोनिया गान्धी, एक महिला भएका नाताले तपाईंलाई महाराष्ट्र सरकारले मसँग गरिरहेको व्यवहारप्रति रिस उठ्दैन ? के तपाईं आफ्नो सरकारसँग डा. अम्बेडकरले दिएको संविधानका मूल्य-मान्यताहरु पालनाका लागि आग्रह गर्न सक्नुहुन्न ?”
उनले आफूमाथि शिवसेनाले गरिरहेको ज्यादतिमा सोनिया गान्धीको मौनता इतिहासमा लेखिने पनि बताएकी छन् ।
उनले अर्को ट्विटमा भनेकी छन्, “तपाईं पश्चिममा जन्मिनुभयो र भारतमा रहनुभयो । तपाईंलाई महिलाहरुको संघर्षका बारेमा अवश्य पनि जानकारी होला । तपाईंको सरकारले महिलालाई दिइरहेको दुःख र कानुनको खिल्ली उडाउँदा पनि तपाईंको लिनुभएको मौनता र उदासिनता इतिहासमा लेखिने छ । मलाई आशा छ यो विषयमा तपाईंले हस्तक्षेप गर्नुहुने छ ।”
गत जुन महिनामा बलिउड अभिनेता सुशान्त सिंह राजपुतको मृत्युपछि कंगनाले बलिउडमा फिल्म इन्डस्ट्रिमा भाइ–भतिजावादका बारेमा अभिव्यक्ति दिएपछि उनी लगातार चर्चामा छन् । पछिल्लो समय मुम्बईको तुलना पाकिस्तान प्रशसित काश्मीरसँग गरेपछि विवादमा घेरिएकी कंगनालाई केन्द्र सरकारले हालै ‘वाई प्लस’ सुरक्षा दिएको छ । – बीबीसी
