विराटनगर, २४ भदौ । बालिका बलात्कारको आरोपमा प्रहरीले मोरङको सुन्दरहरैंचा नगरपालिका–४ बाट एक पुरुषलाई पक्राउ गरेको छ । आफ्नै घरमा भाडा गरी बस्ने १५ वर्षीय बालिकालाई करणी गरेको आरोपमा सुन्दरहरैंचा नगरपालिका–४ का ५४ वर्षीय उमेश नेपाल पक्राउ परेका हुन् । पक्राउ परेका नेपाल अवकाश प्राप्त (पूर्व) भारतीय सैनिक हुन् ।
भाडामा बस्ने बालिकालाई दुई वर्षयता धम्की दिएर करणी गरेको आरोपमा जाहेरी परेपछि पक्राउ गरेको प्रहरीले जनाएको छ ।
बुधबार उनीविरुद्ध जबरजस्ती करणी मुद्दा चलाउन म्याद थप गरेर घटनाको अनुसन्धान अघि बढाएको छ ।
दुई वर्षदेखि आफूमाथि बलात्कार गरिरहेको कुरा बालिकाले मंगलबार साँझ सुनाएपछि अभिभावकले प्रहरीमा बुधबार किटानी जाहेरी दिएका छन् । जाहेरीका आधारमा नेपाललाई पक्राउ गरिएको जिल्ला प्रहरी कार्यालय मोरङका प्रहरी उपरीक्षक सन्तोष खड्काले बताए ।
बालिकाका परिवार चार वर्षदेखि नेपालको घरमा भाडामा बस्दै आएका छन् । प्रहरीका अनुसार बालिकाले आफूमाथि घरकै कोठा, होटल र बाटोमासमेत बलात्कार भएको बयान दिएकी छन् । तर कसैलाई सुनाएमा ज्यान मार्ने धम्की दिएपछि बालिकाले घटनालाई गुपचुप राखेको प्रहरीले बताएको छ ।
भारतीय सेनामा कार्यरत नेपालले विस २०६४ सालमा अवकाश पाएका हुन् । अवकाशपछि घरमै बसेर जग्गा कारोबार गर्दै आएका थिए ।
केराबारीबाट एकजना पक्राउ
मोरङको केराबारीबाट पनि १५ वर्षीया बालिकामाथि बलात्कार प्रयासको अभियोगमा एकजनालाई मंगलबार राति प्रहरीले पक्राउ गरेको छ । पक्राउ पर्नेमा केराबारी गाउँपालिका–७ का ४२ वर्षीय शुक्रबहादुर नेम्वाङ रहेका छन् ।
इलाका प्रहरी कार्यालय बेलबारीका प्रहरी निरीक्षक ऋषिराज ढकाल नेतृत्वको टोलीले नेम्वाङलाई घरैबाट पक्राउ गरेको हो । बालिकामाथि बलात्कारको प्रयास हुँदै गर्दा स्थानीयले देखेर प्रहरीलाई खबर गरेका हुन् ।
