माघ १५ । नेपाल कम्युनिस्ट पार्टी नेकपाले यही माघ २८ गते तय गरेको जनप्रदर्शनलाई ‘अहिलेसम्मकै विशाल’ बनाउने तयारी गरेको छ । केन्द्रीय संघर्ष समिति सचिवालयको बिहीबार बसेको बैठकले प्रदर्शन हालसम्मकै विशाल बनाउनेबारे कार्ययोजना बनाएको केन्द्रीय सदस्य विष्णु रिजालले जानकारी दिए ।
बैठकलाई सम्बोधन गर्दै अध्यक्षद्वय पुषपकमल दाहाल ‘प्रचण्ड’ र माधवकुमार नेपालले आन्दोलन र आन्दोलनमा दिएको समर्थनका लागि सबैलाई धन्यवाद दिएका थिए ।
संविधान, लोकतन्त्र, गणतन्त्र, संघीयता र समानुपातिक प्रणालीको रक्षाका लागि आन्दोलन अपरिहार्य रहेकाले जनपरिचालन गर्नुको विकल्प नरहेको प्रचण्ड–नेपालको ठहर छ ।
बैठकमा अध्यक्षद्वयले आफूहरूसँग केन्द्रीय कमिटीको दुईतिहाइ रहेको र निर्वाचन आयोगले पनि त्यही उल्लेख गरेकाले कुनै दुविधाविना लाग्नुपर्ने बताएको रिजालले जानकारी दिए ।
अध्यक्षद्वयले संविधान भत्काएर प्रधानमन्त्री केपी शर्मा ओलीले चाल्ने कुनै पनि तानाशाही कदमको त्यही रूपमा प्रतिवाद गर्न तयार रहन कार्यकर्तापंक्तिलाई निर्देशनसमेत दिएका छन् ।