एजेन्सी, १९ भदौ । यूईएफए नेशन्स लिगमा रसियाले सुखद सुरुआत गरेको छ । बिहीबार राति भएको समूह चरणको पहिलो खेलमा रसियाले सर्वियालाई ३–१ गोलले हराएको हो ।
घरेलु मैदानमा भएको खेलमा रसियालाई जिताउन अर्टेम डज्युवाले दुई गोल गरे भने भ्याचेस्लाभ काराभयवले एक गोल गरे । सर्बियाका एलेक्जेन्डर मिट्रोभिकले एक गोल गरे ।
पहिलो हाफ गोलरहित बराबरीमा सकिएको उक्त खेलको ४८औं मिनेटमा डज्युवाले पेनाल्टीमा गोल गर्दै रसियालाई अग्रता दिलाए ।
खेलको ६९औं मिनेटमा काराभयवले गोल गरेपछि रसियाले आफ्नो अग्रता दोब्बर बनायो । ७८औं मिनेटमा मिट्रोभिकले गोल गर्दै सर्बियालाई खेलमा फर्काउने प्रयास गरे ।
तर, खेलको ८१औं मिनेटमा डज्युवाले दोस्रो गोल गर्दै रसियालाई ३–१ गोलको जित दिलाए । जितसँगै समूह ‘जी’को रसियाले ३ अंक जोडेको हो ।
सोही समूहको अर्को खेलमा हंगेरीले टर्कीलाई १–० गोलले हराउँदै ३ अंक जोडेको छ ।
