माघ ५ । नेकपाका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीको संसद् विघटनको कदम संविधान र गणतन्त्रमाथिकै प्रहार भएको बताएका छन् ।
पार्टीनिकट महिला संगठनले सोमबार काठमाडौंमा आयोजना गरेको भेलामा बोल्दै उनले यो कुरा राम्रोसँग स्थापित हुनुपर्ने आग्रह राखे ।
“पत्रकार साथीहरू यो कुरालाई राम्रोसँग स्थापित गर्नुपर्छ । केपी ओलीले संसद् विघटन गरेका होइनन् । संविधानमा यो व्यवस्था पनि छैन । प्रधानमन्त्रीलाई यो अधिकार पनि छैन । उनले संविधान र संघीय लोकतान्त्रिक गणतन्त्र नै विघटन गरेका हुन्,” प्रचण्डले भने ।
उनले ढिलो नगरी जनअदालतबाट यो खारेज गर्नुपर्ने बताए । ७० वर्षको त्याग तपस्याबाट आर्जन गरेको उपलब्धि पास्न केपी ओली खलनायक प्रतीत भएको उनले बताए ।
प्रधानमन्त्रीले निरंकुशताको सपना देख्दै परिवर्तनहरूको हत्या गर्न उद्यत रहेको उनले बताएका हुन् । उनले माघ ९ गते विशाल प्रदर्शनमार्फत् जनताको शक्ति देखाउनुपर्ने बताए ।
