चितवन : चितवनको रत्ननगर नगरपालिकाले मेयरसँग उद्यमशिलता कार्यक्रम सञ्चालन गर्ने भएको छ । नगरपालिकाले गरि, विपन्न तथा विदेशबाट स्वदेश फर्किएका युवालई उद्यमी बनाउने उद्देश्यले मेयरसँग उद्यमशिलता कार्यक्रम सञ्चालन गर्न लागिएको नगरपालिकाका प्रवक्त्ता राजेन्द्र हमालले जानकारी दिए । प्रवक्त्ता हमालका अनुसार उद्यमशिलता विकास कार्यक्रम सञ्चालनको लागि नगरपालिकाले बैंकसँग सम्झौता गरिसकेको छ ।
उत्त कार्यक्रमले युवाहरुलाई उद्यमी बनाएर गरिवी न्यूनीकरण गर्ने विश्वास गरिएको छ । उद्यमशिलता विकास कार्यक्रम अन्तर्गत व्यवसाय, कुखुरापालन, गाई, बंगुर, माछा, तरकारी तथा केरा खेती गर्न विना धितो विना व्याज कर्जा लगानी गरिने छ ।
विहीवार काठमाडौंमा आयोजित एक समारोहमा रत्ननगरका मेयर नारायण वन र नेपाल बैंक केन्द्रीय कार्यालयका प्रमुख कार्यकारी अधिकृत कृष्णबहादुर अधिकारीबीच लिखित सम्झौता भएको छ । उत्त कार्यक्रम सञ्चालनको लागि रत्ननगरले एक करोडको कोष स्थापना गरेको छ । नेपाल बैंकले साढे २ करोड लगानी गर्ने गरी सहमति भएको मेयर वनले जानकारी दिए ।
सरकारले उद्यम गर्न चाहनेको लागि व्याजमा दिने छुट कटाएर बाँकी व्याज नगरपालिकाले तिर्ने छ । छिमेकी वा नजिकको आफन्त जवानी बसेको आधारमा नगरपालिकाले कर्जा लगानी गर्ने छ । पहिलो चरणमा २ लाख देखि ५ लाखसम्म कर्जा लगानी गर्ने योजना रहेको मेयर वनले बताए । गरिव, विपन्न र कोरोनाका कारण स्वदेश फर्किएर केही खर्च खोजेका युवाहरुलाई मात्र कर्जा लगानी गर्ने उनको भनाई छ । व्यक्तिको लापरवाहीका कारण पैसा तिर्न नसक्ने अबस्था आए त्यसको जिम्मेवार स्वयम आफै हुने र स्थानीय सरकारले यसको भौतिक सम्पतीबाट रकम असुली गर्ने छ । पहिलो चरणमा करिव २०० युवालाई कर्जा लगानी गर्ने छ । कर्जा लगानी गर्नुपूर्व नगरपालिकाले व्यक्तिले गर्न चाहेको व्यवसाय,पशुपालन तथा विभिन्न खेती गर्ने तरिकाको विषयमा तालिम प्रदान गर्ने छ ।
