काठमाडौं । युवा तथा खेलकुद मन्त्री जगत वहादुर बिश्वाकर्र्माले गण्डकी प्रदेशको पोखरामा संचालन हुने नवौं राष्ट्रिय खेलकुद प्रतियोगिताको मिति राखेपको आगामी बोर्ड बैठकमा तय गरिने बताएका छन् ।
राष्ट्रिय खेलकुद परिषद् (राखेप)को आयोजनामा संचालन भएको अन्तक्रिया कार्यक्रममा उनले नवौंको मिति तोक्ने जिम्मेवारी राखेपलाई भएको बताए । साथै उनले खेलाडीको स्वास्थ्यलाई जोखिममा राखेर राज्य अगाडि बढ्न नसक्ने भएकाले कोभिडको प्रभाब र असरलाई ध्यानमा राखेर मिति तय गर्न सुझाव दिए ।
“१३औं साग सम्पन्न पश्चात एक वर्षको अवधिमा खेलकुदले धेरै कुरा गुमाएको छ, कोरानाको परिवेश नभएको भए नवौं राष्ट्रिय खेलकुद तोकिएकै समयमा आयोजना हुने थियो । अझै पनि नवौं राष्ट्रिय खेलकुुद हुन्छ त्यसका लागि राखेपले उपयुक्त मिति तय गर्नेछ,” मन्त्री विश्वकर्माले भने ।
अन्तरक्रियामा नवौं राष्ट्रिय खेलकुद–२०७७ आयोजना तथा संचालन सम्बन्धी विषयमा छलफल भएको थियो । त्यस्तै राष्ट्रिय खेलकुद विकास ऐन २०७७ को कार्यन्वयन तथा राष्ट्रिय संघको जिम्मेवारी दायित्व र खेल गतिविधि संचालन र सुचारु गर्ने सम्बन्धमा ३६ राष्ट्रिय संघबीच छलफल भएको थियो ।
