नेपाली कांग्रेसका महामन्त्री गगन थापाले एमाले र कांग्रेसबीच सत्ता साझेदारीलाई ठीक ठाउँमा पुर्याउन चुनौतीपूर्ण भएको बताएका छन् । नेपाली कांग्रेसको केन्द्रीय समितिको बैठकमा बोल्दै महामन्त्री थापाले यसका आफ्नै च्यालेन्ज भएको बताएका हुन् ।
एमाले र कांग्रेस मिल्दा ओभरअल सिस्टममै जोखिम भएको थापाको बुझाइ छ । ‘हिजो एमाले सत्तामा हुँदा कांग्रेस प्रतिपक्षमा थियो । हामीले प्रश्न गर्दा भेन्टिलेटर हुन पाएको थियो । हामी सत्तामा हुँदा एमाले प्रतिपक्षमा थियो त्यो बेला पनि भेन्टिलेटर हुन पाएको थियो’, थापाले भने, ‘अहिले त हामी दुवै सरकारमा छौं । यो बेला हामीले काम गरेर परिणाम दिनपर्ने छ । हामी काम गरेर परिणाम दिन लागि पर्ने छ ।’
उनले नेतृत्वका बीचमा हुने हार्दिकता विश्वास र समझदारी महत्त्वपूर्ण हुने बताए । उनले पार्टी सभापति र एमाले अध्यक्षका बीचमा हुने विश्वास हार्दिकता र विश्वास सरकार सञ्चालनमा महत्वपूर्ण हुने बताए ।
दुई पार्टीका बिचमा हरेक ठाउँमा प्रतिस्पर्धा भएर संयन्त्र बनाएर नै काम गर्नु पर्ने उनको भनाइ छ । उनले भने, ‘अहिले केपी ओली नेतृत्वको सरकारलाई सफल बनाउनु पनि छ भोलि ८४ को चुनावमा पनि प्रतिस्पर्धा गर्नु छ । यसले अहिले हामीले व्यतित्वलाई पनि जोगाएर राख्नु पर्छ । हामीले गरेका स-साना कुराले ठूलो प्रभाव पर्ने भएकाले जोखिम रहेको छ ।’
