केही समयअघि अमेरिकी फुटबल क्लब इन्टर मियामी एसिया भ्रमणमा आएका थिए। एसिया भ्रमणका क्रममा इन्टर मियामीले हङ्कङमा प्रदर्शनी खेल खेलेको थियो मेस्सी पनि इन्टर मियामीबाटै ब्यवसायीक फुटबल खेल्छन् ।
त्यो खेलमा मेस्सी मैदानमा ओर्लिएका थिएनन् । हङ्कङमा मेस्सीको खेल हेर्न हजारौँ समर्थकले महंगो मूल्यमा टिकट खरिद गरेका थिए । मेस्सीले नखेलेपछि त्यस बेला समर्थकहरू आक्रोशित बनेका थिए ।
खेलकुदमा राजनीति मिसाउन खोजेको भनी चिनियाँ फुटबल समर्थकहरूले आरोप समेत लागाएका थिए । आफूमाथि लगाएको आरोपको विषयमा अर्जेन्टिनी स्टार लियोनल मेस्सीले सामाजिक सञ्जालमार्फत आफ्नो धारणा सार्वजनिक गरेका छन् ।
उनले स्वास्थ्य समस्याका कारण आफूले हङ्कङमा मैत्रीपूर्ण फुटबल खेल्न नसकेको बताएका छन् । उनले एक भिडियो सार्वजनिक गर्दै आफूले हङ्कङमा नखेल्नुको पछाडि कुनै राजनीतिक कारण नरहेको दाबी पनि गरेका छन् ।
चिनियाँ समर्थकलाई सम्बोधन गर्दै मेस्सीले जारी गरेको भिडियो सन्देशमा भनिएको छ ‘हङ्कङमा मेरो अनुपस्थितिको विषयलाई लिएर विभिन्न आरोप लगाइएको छ । यस्ता आरोपमा कुनै सत्यता छैन । मैले फुटबलमा राजनीति मिसाउने कुनै कार्य गरेको छैन,’ त्यसअघि साउदी अरेबियामा खेलिएको मैत्रीपूर्ण खेलमा भने मेस्सी मैदानमा ओर्लिएका थिए ।
