प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले सरकार ढाल्ने षड्यन्त्र भइरहेको बताएका छन् ।
काठमाडौंमा आज पार्टीको प्रशिक्षण कार्यक्रमलाई सम्बोधन गर्दै उनले यस्तो बताएका हुन् । गठबन्धन तोड्ने र सरकारलाई ढाल्ने धेरै कसरत भइरहेको भएपनि सफल हुन नसकेको उनले बताए ।
प्रधानमन्त्री दाहालले कुनै ठूलो घटना नभए गठबन्धन ५ वर्षसम्म नै चल्ने बताए । उनले अहिले अतिवादी विचार र प्रवृत्तिहरु कहीँ धार्मिक, कतै जातीय माध्यमबाट परिवर्तनलाई उल्ट्याउन, माओवादी आन्दोलन कमजोर पार्न उद्धत रहेको बताए ।
उत्पीडित, जाति, वर्ग समुदायको हक अधिकारको निम्ति लडेको माओवादीले मात्रै यी समस्या समाधान गर्नसक्ने दाबी गर्दै उनले भने, ‘माओवादीले मात्रै जातीय एकता र सद्भाव कायम राख्नसक्छ ।’
