कप्तान लियोनल मेस्सीको दुई गोल गर्दा इन्टर मियामी ओर्लान्डो सिटीलाई पराजित गर्दै लिग्स कप २०२३ को अन्तिम १६ मा स्थान बनाएको छ ।
लिग्स कपको राउन्ड अफ ३२ को खेलमा मियामीले ३–१ को जित निकाल्दै अन्तिमा १६ मा प्रवेश गरेको हो ।
मियामीका लागि प्लेयर अफ द म्याच घोषित कप्तान मेस्सीले दुई गोल गर्दा जोसे मार्टिनेजले १ गोल गरे । ओर्लान्डोका लागि सेजार अराउजोले गोल फर्काएका थिए ।
मियामीले क्वाटरफाइनलमा पुग्न एफसी डालासको सामना गर्नेछ । डालासले मेक्सिकोको माजात्लानलाई २–१ ले हराउँदै अन्तिम १६ मा स्थान पक्का गरेको हो ।
खेलको सातौं मिनेटमा मेस्सीले इन्टरलाई अग्रता दिलाए । उनले रोबर्ट टेलरको पासमा गोल गरेका थिए । १७ औं मिनेटमा ओर्लान्डोले बराबरी गोल फर्कायो ।
दोस्रो हाफको सुरुवातमामियामीले पेनाल्टी पायो । एन्टोनियो कार्लोसले मार्टिनेजलाई लडाएपछि रेफ्रीले पहेंलो कार्ड देखाउँदै पेनाल्टी दिएका थिए ।
मार्टिनेजले गोलरक्षकलाई विपरित दिशामा पठाउँदै पेनाल्टीमा गोल गरे । ७२ औं मिनेटमा मेस्सीले व्यक्तिगत दोस्रो गोल गर्दै ३– १ को जित निकाले ।
