काठमाडौं । अष्ट्रेलियाले भारतविरुद्धको तीन खेलको एकदिवसीय सिरिज जितेको छ । आइतबार भएको दोस्रो एकदिवसीय खेलमा पनि सहज जित निकाल्दै अष्ट्रेलियाले भारतलाई ५१ रनले पराजित गर्दै सिरिज जितेको हो ।
सिड्नी क्रिकेट ग्राउन्डमा अष्ट्रेलियाले जितका लागि दिएको ३९० रनको लक्ष्य भारतले निर्धारित ५० ओभरमा ९ विकेट गुमाउँदै मात्र ३३८ बनाएको हो ।
भारतका लागि विराट कोहली र केएल राहुलले अर्धशतकीय पारी खेले ८७ बल खेलेका कप्तान कोहलीले ७ चौका र २ छक्काको सहयोगमा ८९ रनको योगदान गरे । त्यस्तै ६६ बल खेलेका राहुलले ४ चौका र ५ छक्काको सहयोगमा ७६ रन बनाए ।
भारतका लागि श्रेयस अैयरले ३८ रन बनाउँदा शिखर धावनले ३० रनको योगदान गरे । बलिङतर्फ अष्ट्रेलियाका लागि प्याट कमिन्सले सर्वाधिक तीन विकेट लिए । त्यस्तै जोस हाजेउड र आदम जाम्पाले समा दुई–दुई विकेट लिए ।
यसअघि, टस जितेर पहिले ब्याटिङ गरेको अष्ट्रेलियाले निर्धारित ५० ओभरमा ४ विकेट गुमाउँदै ३८९ रन बनाए थियो । अष्ट्रेलियाका लागि स्थिभ स्मिथले शतकीय पारी खेले । ६४ बल खेलेका उनले १४ चौका र २ छक्काको सहयोगमा १०४ रनको योगदान गरे ।
पहिलो म्याचमा समेत स्मिथले १०५ रन बनाएका थिए । त्यस्तै डेविड वार्नरले ८३,कप्तान एरोन फिन्चले ६०, मर्नुस लाबुशेनले ७० र ग्लेन म्यास्कवेलले २९ बलमा ६३ रन बनाए । उनले २५ बलमा अर्धशतक पूरा गरे । भारत र अष्ट्रेलियाबीचको अन्तिम एकदिवसीय मंगलबार हुनेछ ।
