नेपाली कांग्रेस नेता तथा पूर्व मन्त्री ज्ञानेन्द्रबहादुर कार्कीले अहिलेकै गठबन्धन पाँच वर्ष टिक्ने बताएका छन् । सुनसरी इनरुवा नगरपालिका ४ को हनुमान चौकदेखि सीमावर्ती देवानगञ्ज गाउँपालिकासम्म जोड्ने सडकको शिलान्यास गर्दै उनले अहिलकाे गठबन्धन पाँच वर्ष टिक्ने बताएका हुन् ।
उनले एमाले र कांग्रेस मिल्ने सम्भावना नरहेको बताए ।
उनले नेपालमा अस्थिरता मच्चाउने शक्ति सक्रिय रहेको दाबी गरे । ‘ वर्तमान सरकार ढल्छ भन्ने हल्ला चलाइएको छ, म तपाईँहरूलाई ढुक्कका साथ भन्छु आउने पाँचै वर्ष गठबन्धनको सरकार टिक्छ, उनले भने,‘ एमाले पाँचै वर्ष प्रतिपक्षी हुन्छ ।’ उनले नेकपा एमाले र काँग्रेस मिलेर सरकार बनाउने हल्ला मात्रै भएको दाबी गरे ।
देवानगञ्जबाट हनुमान चोसम्मको सडक करिब २३ किलोमिटर छ । देवानगञ्जबाट सुरु हुनेगरी साढे १० किलोमिटर सडक ठेक्का लागेको हो । पूर्व मन्त्री कार्कीले सोमबार हनुमान चोकमा सडक शिलन्यास गरेका हुन् । सडक शिलन्यास पछि कार्कीले उद्घाटन भने देवानगञ्जमा पुगेर गर्ने बताए । उनले तोकिएको अवधीमा निर्माण सम्पन्न गर्न ठेकेदारलाई निर्देशन दिए ।
सडक शिलन्यासका क्रममा कोशी प्रदेशका भौतिक पूर्वाधार विकास मन्त्री दुर्गा चापागाईंले प्रदेश सरकारले पूर्वाधार विकासलाई प्राथमिकतामा राखेको बताए । शिलन्यास गरिएको सडक समयमा नै सम्पन्न गर्न ठेकेदार कम्पनीलाई उनले निर्देशन दिए । पूर्वाधार विकास कार्यालय विराटनगरका प्रमुख शुशिल श्रेष्ठका अनुसार साढे १० किलोमिटर सडक निर्माणका लागि ३२ करोड ८३ लाख ५ हजारमा महाविर इन्जिनियरिङ एण्ड कन्सट्रक्सन प्रालीले ठेक्का पाएको छ । सम्झौतामा २०८३ साल बैशाख ५ गते भित्र काम सक्नुपर्ने उल्लेखे छ ।
