बैशाख १० गते हुने उपनिर्वाचनमा चितवन निर्वाचन क्षेत्रनम्बर– २ को प्रतिनिधि सभा सदस्यका लागि रवि लामिछानेले उम्मेदवारी दर्ता गराएका छन् । राष्ट्रिय स्वतन्त्र पार्टीका सभापतिसमेत रहेका लामिछानेले निर्वाचन अधिकृतको कार्यालयमा पुगेर उम्मेदवारी दर्ता गराएका हुन् ।
उम्मेदवारी दर्ता पछि उनले उपनिर्वाचनबाट उत्साहित र आशावादी रहेको बताएका छन् । विगतमा पनि यही प्रक्रियाबाट निर्वाचित भएको र अहिले फेरि त्यही प्रक्रिया अपनाउँदा केही अनौठो लागे पनि आफू आशावादी रहेको उनले बताए ।
‘पहिले यही प्रक्रियाबाट गएको, अहिले फेरि यही प्रक्रियामा जाँदा केही अनौठो लागेको छ,’ उनले भने,‘राजनीतिक जीवनमा, मान्छेको जीवनमा भइरहने घटना हुन् ।’ उनले दिउँसो १ बजे उम्मेदवारी दर्ताको समय लिएको भए पनि तनहुँ जाने कार्यक्रम रहेकोले बिहानै उम्मेदवारी दर्ता गरेको बताए ।
उपनिर्वाचनको मतदान २०८० वैशाख १० गते हुनेछ । चितवन २ सँगै तनहुँ– १ र बारा– २ मा पनि वैशाख १० गते उपनिर्वाचन हुँदैछ ।
