पेरिस सेन्ट जर्मेन (पिएसजी) ले फ्रेन्च लिग वानमा एन्जर्सलाई पराजित गरेको छ । विश्व विजेता फरवार्ड लियोनेल मेस्सी विश्वकपपछि फर्किएको खेलमा शीर्षस्थानमा रहेको पिएसजीले एन्जर्सलाई २–० ले पराजित गरेको हो ।
पिएसजीको जितमा ह्युगो इकिटिक र मेस्सीले गोल गरे । बुधबार राति भएको खेलको पाँचौं मिनेटमा ह्युगो इकिटिकले गोल गर्दै पिएसजीलाई अग्रता दिलाए । खेलको ७२औं मिनेटमा मेस्सीले गोल गर्दै अग्रता दोब्बर बनाए । मेस्सीले पनि नोर्डी मकिएलीको पासमा गोल गरेका थिए । विश्वकपपछिको पहिलो खेलमा नै मेस्सीले गोल गरेका हुन् ।
विश्वकप जितेपछि मेस्सी लामो समय विदामा बसेका थिए । विश्वकपपछि पिएसजीले ४ खेल खेलिसकेको छ । मेस्सी यसअघिका तीन खेलमा सहभागि थिएनन् ।
जितसँगै पिएसजीले शीर्षस्थानमा ६ अंकको स्पष्ट अग्रता बनाएको छ । पिएसजीको १८ खेलबाट ४७ अंक छ । दोस्रो स्थानमा रहेको लेन्सको ४१ अंक छ ।
