काठमाडौं । ग्यारेथ बेलको निर्णायक गोलमा टोटनहम विजयी भएको छ । आइतबार राति भएको खेलमा बेलले निर्णायक गोलले टोटनहम ब्राइटनमाथि २-१ गोलले विजयी भएको हो ।
खेलको १३औं मिनेटमा ह्यारी केनले गोल गर्दै घरेलु टोली टोटनहमलाई अग्रता दिलाएका थिए । उनले पेनाल्टीमा गोल गर्दै पहिलो हाफमा टोटनहमलाई १-० को अग्रता दिलाएका हुन् ।
दोस्रो हाफमा दुवै टोलीले एक-एक गोल गरेका थिए । खेलको ५६औं मिनेटमा टरिक्यु लाम्पटीले गोल गर्दै खेल बराबरीमा ल्याएका हुन् । उनले ग्राबोको पासमा गोल गर्दै खेल १-१ को बरारबीमा ल्याएका थिए । तर, दोस्रो हाफमा मैदान छिरेका बेलले निर्णायक गोल गरे ।
खेलको ७०औं मिनेटमा एरिक लमेलाको स्थानमा मैदान प्रवेश गरेका बेलले मैदान छिरेको ३ मिनेट नबित्दै गोल गरेका थिए । उनले खेलको ७३औं मिनेटमा रेगुइलोनको पासमा गोल गर्दै टोटनहमलाई २-१ को जित दिलाएका हुन् ।
स्पेनिस क्लब रियल मड्रिडबाट यसै सिजन बेल टोटनहम पुगेका थिए । स्पेनबाट इङ्ल्यान्ड फर्किएपछि प्रिमियर लिगमा गरेको बेलको यो पहिलो गोल हो ।
यस जितसँगै टोटनहम सात खेलबाट १४ अंक जोड्दै तालिकाको दोस्रो स्थानमा उक्लिएको छ । समान खेल खेलेको ब्राइटन भने पाँच अंक जोड्दै १६औं स्थानमा छ ।
