नागरिकता ऐनलाई संशोधन गर्न बनेको विधेयक प्रमाणीकरणका लागि दोस्रो पटक राष्ट्रपति कार्यालय पठाउने तयारी भएको छ ।
राष्ट्रपति विद्यादेवी भण्डारी प्रतिनिधि सभा र राष्ट्रिय सभाले पारित गरेर प्रमाणीकरणका लागि पठाएको नागरिकता विधेयक गत साउन २९ गते संसदमै फिर्ता गरेकी थिइन् । राष्ट्रपतिले पुनर्विचारका लागि फिर्ता गरे पनि दुवै सदनले विधेयकमा कुनै परिवर्तन नगरी दोस्रो पटक हुबहु पारित गरेको थियो ।
राष्ट्रपति भण्डारीले नागरिकता विधेयक फिर्ता गर्दा ७ बुँदे र ध्यानाकर्षण भन्दै अर्को ८ बुँदे सन्देश पठाएकी थिइन्। राष्ट्रिय सभाले विधेयक पारित गरेको जानकारी भदौ १९ गते प्रतिनिधि सभालाई पठाएको थियो। राष्ट्रिय सभाको सन्देश प्राप्त भएलगत्तै आजै सभामुख अग्नि सापकोटाले विधेयक राष्ट्रपति कार्यालयमा पठाउने तयारी गरेको बताइएको छ ।
संविधानको धारा ११३ मा राष्ट्रपतिले विधेयक पुनर्विचारका लागि संघीय संसदमा फिर्ता पठाउन सक्ने व्यवस्था छ। तर पुनर्विचारका लागि फिर्ता भएको विधेयक प्रस्तुत रूपमा वा संशोधनसहित पारित गरी पुन पेश गरेपछि राष्ट्रपतिले १५ दिनभित्र प्रमाणीकरण गर्नेपर्ने व्यवस्था छ । राष्ट्रपतिले विधेयक प्रमाणीकरण गरेपछि त्यसले ऐनको रूप लिने छ ।
