नर्वेविरुद्ध ८–० गोलान्तरको फराकिलो जित दर्ता गर्दै घरेलु टोली इंग्ल्यान्ड महिला युरो च्याम्पियनसिपको अन्तिम आठमा प्रवेश गरेको छ ।
फाल्मर रङ्गशालामा हिजो भएको खेलमा इंग्ल्यान्डलाई जिताउन बेथ मिडले ह्याट्रिक गरिन् । खेलको १२औं मिनेटबाट गोल गर्न सुरू गरेको इंग्ल्यान्डले पहिलो हाफअघि ६ गोल गर्याे ।
हाफपछि दुई गोल गरेको इंग्ल्यान्डले समूह ‘ए’ काे शीर्ष स्थान कब्जा गर्दै च्याम्पियनसिपमा यात्रा सहज बनाएकाे छ ।
हिजै सम्पन्न अर्काे खेलमा अस्ट्रियाले प्रतियाेगितामा आफ्नो पहिलाे जित दर्ता गरेको छ । सेन्ट मेरी रङ्गशालामा भएको खेलमा अस्ट्रियालाई विजयी गराउन क्याथरिना सिस्नल र एलिसा नास्चेन्वेङले एक–एक गोल गरिन् ।
समूह ‘ए’ मा रहेका यी चार राष्ट्रमध्ये लगातार दुई खेलमा हार बेहोरेको नर्दन आयरल्यान्ड प्रतियोगिताबाट बाहिरिएको छ ।
नर्दन आयरल्यान्ड पहिलो खेलमा नर्वेसँग ४–१ र दोस्रो खेलमा अस्ट्रियासँग २–० ले पराजित भएको थियो ।
समूह चरणमा आ–आफ्नो एक–एक खेल जितेको अस्ट्रिया र नर्वेले खातामा समान दुई अङ्क बटुलेका छन् ।
जुलाई १६ मा हुने समूह चरणको अन्तिम खेलमा अस्ट्रिया र नर्वेबीचको विजेताले आगामी चरणमा आफ्नो स्थान पक्का गर्नेछ ।
च्याम्पियनसिपबाट बाहिरिएको नर्दन आयरल्यान्डले सोही दिन इंग्ल्यान्डसँग खेल्नेछ ।
जुलाई ६ मा औपचारिक रुपमा सुरू भएको प्रतियोगिता इंग्ल्यान्डका विभिन्न दश सहरमा जुलाई ३१ सम्म आयोजना हुनेछ ।
