नेकपा एकीकृत समाजवादीले केन्द्रीय कमिटी र पोलिटब्यूरोको बैठक बोलाएको छ ।
बैठक आगामी असार १० र ११ गते बस्ने कार्यसूची रहेको केन्द्रीय प्रचार विभागका सचिव प्रकाश खतिवडाले जानकारी दिए।१० गते पोलिटब्यूरो र ११ गते केन्द्रीय कमिटी बैठक बस्ने भएको हो। बैठकमा गत ३० वैशाखमा सम्पन्न भएको स्थानीय तह निर्वाचनको समीक्षा हुने बताइएको छ ।
बैठकले आगामी संसदीय निर्वाचनमा कसरी अघि बढ्ने भन्नेबारेमा पनि छलफल गर्नेछ। प्रदेश र प्रतिनिधिसभाका निर्वाचनमा आफ्ना उम्मेदवारलाई विजयी बनाउन आवश्यक रणनीतिबारे छलफल केन्द्रीत हुने छ । बैठकले यसअघि बसेको स्थायी कमिटीको बैठकका निर्णय अनुमोदन गर्ने खतिवडाले बताए ।
त्यस्तै, १३ र १४ गते केन्द्रीय परिषदको बैठक समेत बोलाइएको उनले बताए । परिषदको बैठकमा देशभरबाट ५ सय बढी प्रतिनिधि उपस्थित हुने बताइएको छ ।
