प्रतिनिधि सभामा अर्थमन्त्री जनार्दन शर्माले आफूले करको दर परिर्वतन गर्दा राष्ट्रघात नगरेको दाबी गर्नुभएको छ ।
बिहीबार प्रतिनिधि सभामा सांसदहरुले उठाएको मन्त्रालय सम्बन्धी प्रश्नको जवाफ दिँदै मन्त्री शर्माले करको दर परिर्वतन गर्दा कुनै किसिमको राष्ट्रघात नगरेको बताउनुभएको हो ।
उहाँले राजश्वका दरहरु परिवर्तन गर्ने आवश्यक प्रक्रियाअनुसार सम्बन्धित विभागीय प्रमुखहरु र सचिवहरु सहितको कमिटीबीच छलफल गरेरै निर्धारण गरेको बताउनुभयो । मन्त्री शर्माले राजश्वका दर परिर्वतन गर्ने प्रचलनअनुसार परिर्वतन गरेका दर रेटहरुप्रति आफू पूर्ण जिम्मेवार र जवाफदेही रहेको बताउनुभयो ।
उहाँले देशको डलरको सञ्चिति, आयात, उत्पादन र औद्योगिक वातावरण लाई कसरी अगाडि बढाउने भन्ने विषयलाईसमेत ध्यानमा राखेर करका दरहरु परिर्वतन गरेको दाबी गर्नुभयो । मन्त्री शर्माले करका दर परिर्वतन गर्दा कुनैपनि मान्छेभित्र नपसेको दाबी स्पष्ट पार्नुभयो ।
अर्थमन्त्री शर्माले कोरोना बिमा बापत पाउने रकम भुक्तानीको लागि बिमा कम्पनीहरुसँ छलफल भइरहेको बताउनुभयो ।
मन्त्री शर्माले बिमा कम्पनीहरुसँग भएको छलफल अनुसार छिटै रकम भुक्तानी दिने प्रक्रियाको तयारी गरिरहेको बताउनुभयो ।
