प्रहरीले ठूलो रकमसहित चार चिनियाँ नागरिकलाई चन्द्रागिरी नगरपालिका–२, नागढुङ्गाबाट पक्राउ गरेको छ ।
उनीहरूबाट स्रोत नखुलेको नगद तीन करोड ८९ लाख १३ हजार सात सय २० रुपैयाँ बरामद भएको प्रहरीले जनाएको छ ।
नुवाकोटबाट काठमाडौँतर्फ गुडिरहेको बिएबी ५७१० नम्बरको कार नियन्त्रणमा लिँदा ती व्यक्ति पक्राउ परेका हुन् । नुवाकोटको बिदुर नगरपालिका–८ का कार चालक ४४ वर्षे फूलबहादुर गुरुङ पनि पक्राउ परेका छन् ।
पक्राउ परेका चिनियाँ नागरिकमा ५० वर्षे अङ जाइकिङ, ४९ वर्षे झान टु, ३१ वर्षे मेङ युन सुन र २६ वर्षे मौजियान हुआ रहेको प्रहरीले जनाएको छ ।
कारको डिक्कीमा प्लास्टिकको बोरामा लुकाइ ल्याइएको नगद फेला पारिएको प्रहरी भनाइ छ । प्रहरीका अनुसार थप अनुसन्धान भइरहेको छ ।
