नेपाली काङ्ग्रेस सभापति तथा प्रधानमन्त्री शेरबहादुर देउवाको गृह जिल्ला डडेलधुराको सदरमुकामसमेत रहेको अमरगढी नगरपालिकामा प्रमुख, उपप्रमुख तथा ११ मध्ये १० वडामा काङ्ग्रेसले जित हासिल गरेको छ ।
उक्त नगरपालिकाको वडा नम्बर ८ मा काङ्ग्रेस (विपि) विजयी भएको छ । २०७४ सालको निर्वाचनमा नगर प्रमुख र उपप्रमुखमा एमाले विजयी भएको अमरगढीमा यस पटक काङ्ग्रेसले कब्जा गरेको छ ।
अमरगढी नगरपालिकाको निर्वाचनलाई निकै महत्वका साथ हेरिएको थियो । काङ्ग्रेस डडेल्धुराका निवर्तमान सभापति कर्ण मल्ल पक्षले काङ्ग्रेस विपिबाट एमालेसँग तालमेल गरी अमरगढीसहित जिल्लाका सबै सात पालिाकामा निर्वाचन लडेका थिए ।
काङ्ग्रेसका डिल्लीराज जोशीले काङ्ग्रेस (विपि) का हरिप्रसाद भट्टलाई एक सय ९३ मतले पराजित गर्दै नगर प्रमुखमा विजय प्राप्त गरे । उपप्रमुखमा पनि काङ्ग्रेसकै पार्वती झुकाल विजयी भइन् । डिल्लीराज र पार्वती २०७४ सालको निर्वाचनमा एमालेका उम्मेदवारसँग पराजित भएका थिए ।
अमरगढीमा यस पटक काङ्ग्रेस र काङ्ग्रेस (विपि) बीच प्रतिस्पर्धा रहेको थियो । नगर प्रमुखमा विजयी डिल्लीराजले तीन हजार ६ सय १९ मत प्राप्त गरे । भने उनका निकटतम प्रतिद्वन्द्वी काङ्ग्रेस विपिका हरिप्रसादले तीन हजार ४ सय २६ मत प्राप्त गरे ।
त्यस्तै, उपप्रमुखमा विजयी पार्वतीले तीन हजार ६ सय ७८ मत पाउँदा उनका निकटतम प्रतिद्वन्दी यज्ञराज अवस्थीलले तीन हजार ८५ मत प्राप्त गरे ।
अमरगढी नगरपालिकाका ११ वडामध्ये वडा नम्बर ८ मा काङ्ग्रेस (विपि) विजयी भएको छ भने बाँकी १० वडामा काङ्ग्रेसको पुरै प्यानन विजयी भएको छ ।
