नेपाली कांग्रेस प्रदेश नम्बर २ को अधिवेशनबारे निर्णय गर्न केन्द्रीय निर्वाचन समितिका दुई सदस्यलाई जनकपुर पठाइएको छ ।
केन्द्रीय कार्यालयका सचिव केशव रिजालका अनुसार केन्द्रीय निर्वाचन समितिका सदस्यद्वय सिताराम केसी र तेजबहादुर रावललाई पठाइएको छ । प्रदेशको अधिवेशन बिहीबार नै उद्घाटन भए पनि केही जिल्लाको क्षेत्रीय अधिवेशन हुन नसकेकाले रोकिएको छ । सात मध्ये ६ वटा प्रदेश अधिवेशनबाट नयाँ नेतृत्वसमेत चयन भइसकेको छ ।
रिजालका अनुसार प्रदेशका नेताहरु, प्रदेश निर्वाचन समितिका पदाधिकारीहरुसँग भेटेपछिमात्रै २ नम्बर अधिवेशनबाट निर्णय हुनेछ । ‘केन्द्रीय निर्वाचन समितिका सदस्यहरुले छलफल गरेपछि मात्रै के निर्णय गर्ने भन्ने निष्कर्षमा पुग्न सकिन्छ,’ उहाँले भन्नुभयो ।
महोत्तरी, सर्लाही, बारा र रौतहटका कतिपय स्थानमा क्षेत्रीय अधिवेशन हुन नसक्दा प्रदेश अधिवेशनमा व्यवधान भएको हो । सर्लाही र महोत्तरीमा आज पनि क्षेत्रीय अधिवेशनहरु भइरहेका छन् ।
प्रतिक्रिया
सम्बन्धित खवर
