नवप्रवेशी क्लबसँग हार बेहोरेपछि स्पेनिस क्लब बार्सिलोनाले मुख्य प्रशिक्षक रोनाल्ड कोम्यानलाई बर्खास्त गरेको छ । ला लिगाअन्तर्गत बुधबार राति नवप्रवेशी क्लब रायो भालेकानोसँग १–० गोलले पराजित भएको तीन घण्टा बित्न नपाउँदै बार्सिलोनाले कोम्यानलाई बर्खास्त गरेको हो ।
नयाँ सिजनमा बार्सिलोनाले लगातार खराब प्रदर्शन गरिरहेको छ । स्टार खेलाडी लियोनल मेस्सीले क्लब छाडेपछि लय गुमाएको बार्सिलोनाले स्टेटमेन्ट जारी गर्दै क्लब अध्यक्ष जोन लापोर्टाले बर्खास्ती गरेको निर्णय कोम्यानलाई जानकारी दिएको जनाएको छ ।
उनले १४ महिना प्रशिक्षकका रूपमा काम गरेका थिए । बार्सिलोनाले नयाँ सिजनको ला लिगामा १० खेलबाट जम्मा १५ अङ्क जोडेको छ । च्याम्पियन्स लिगको समूह चरणमा दुई खेल हारिसकेको छ । बार्सिलोना ला लिगाको अङ्कतालिकामा नवौं स्थानमा छ । यो सिजनको पहिलो एल क्लासिकोमा पराजित भएपछि केहीदिन अघि समर्थकले उनको गाडीमाथि आक्रमण प्रयास गरेका थिए ।
कोम्यानको बर्खास्तपछि अब बार्सिलोनामा को प्रशिक्षक आउँछन् भन्ने खुलेको छैन ।
