टी-ट्वान्टी विश्वकप २०२१ सुपर बाह्र अन्तर्गत गएराती सम्पन्न खेलमा पाकिस्तानले न्युजिल्याण्डमाथि बलियो जीत निकालेको छ ।
युएईको सारजाह क्रिकेट स्टेडियममा टस हारेर पहिलो ब्याटिङको निम्तो पाएको न्युजिल्याण्ड २० ओभरमा ८ विकेटको क्षतिमा १३४ रनमा समेटिएको थियो ।
न्युजिल्याण्डलाई सस्तैमा समेट्न पाकिस्तानका तीव्रगतिका बलर हरिश रौफले चार ओभरमा २२ रन खर्चिएर सर्वाधिक चार विकेट लिन सफल भएका थिए ।
१३५ रनको विजय लक्ष्य बोकेर ब्याटिङमा उत्रिएको पाकिस्तानले १८ दशमलव ४ ओभरमा पाँच विकेटको क्षतिमा लक्ष्य पूरा गरेपछि पाकिस्तानले न्युजिल्याण्डलाई पाँच विकेटले पराजित गरेको हो ।
पाकिस्तानका लागि महम्मद रिजवानले सर्वाधिक ३३ रन बनाएका थिए । पाकिस्तानको यो लगातार दोस्रो जित हो । यसअघि पाकिस्तानले आफ्नो पहिलो खेलमा भारतलाई १० विकेटले पराजित गरेको थियो ।
यो जीतसँगै पाकिस्तान समूह बी मा शीर्ष स्थानमा उक्लिएको छ भने अफगानिस्तान दोस्रो स्थानमा रहेको छ ।
त्यसैगरी गएराती नै सम्पन्न पहिलो खेलमा दक्षिण अफ्रिकाले साविक विजेता वेष्ट इन्डिजलाई ८ विकेटले पराजित गरेको थियो ।
आजको पहिलो खेल इङ्ल्याण्ड र बंगलादेशबीच दिउँसो ३.४५ बजे तथा दोस्रो खेल स्कटल्याण्ड र नामिबियाबीच साँझ ७.४५ बजे खेलिंदैछ ।-
