वाग्मती प्रदेशकी मुख्यमन्त्री अष्टलक्ष्मी शाक्यले आज विश्वासको मत लिने तयारी गरेकी छिन् ।
दिउँसो ३ बजे सुरु हुने प्रदेशसभाको नवौं अधिवेशनमा उनले विश्वासको मत लिन लागेकी हुन् ।
मुख्यमन्त्रीका राजनीतिक सल्लाहकार माधव अर्यालले गत शुक्रबार विश्वासको मतसम्बन्धी प्रस्ताव संसदमा दर्ता गराएका थिए ।
शाक्यले भोलिसम्म संसदमा विश्वासको मत लिनुपर्ने कानुनी बाध्यता छ । गत भदौ २ मा एमालेको एकल बहुमतबाट सत्तारोहण गरेकी मुख्यमन्त्री शाक्यले संसदममा विश्वासको मत नपाउने देखिएको छ ।
एक सय नाै जना प्रदेशसभा सदस्य रहेको बागमतीमा सरकार जोगाउन शाक्यलाई ५५ मत आवश्य छ । हाल प्रदेशसभामा एमालेका ४३ सांसद छन् ।
विपक्षी गठबन्धनमा रहेका माओवादी केन्द्रका २३, नेपाली काङ्ग्रेसका २२, एकीकृत समाजवादी १३ र जनता समाजवादीको १ मत गरी ५९ जना सांसदले शाक्यलाई विश्वासको मत नदिने र नयाँ सरकार घोषणा गर्ने बताएका छन् ।
तीन मत रहेको विवेकशील साझा पार्टीले विश्वासको मत नदिने बताएको छ । विपक्षी गठबन्धनले मुख्यमन्त्री शाक्य नेतृत्वको सरकार विस्थापित गर्दै नयाँ सरकार बनाउने तयारी गरेको छ ।
एकीकृत समाजवादीको संसदीय दलका नेता राजेन्द्र पाण्डेको नेतृत्वमा सरकार बनाउने तयारी भएको हो । गठबन्धनमा हाल ६० जना सांसद छन् ।
यसैबीच, वाग्मती प्रदेशका सभामुख सानुकुमार श्रेष्ठले दलहरूसँग परामर्श गर्न बिहान ११ बजे कार्यव्यवस्था परामर्श समितिको बैठक बोलाएका छन् । प्रदेश सभा सचिवालयमा विश्वासको मत लिन प्रस्ताव पेस गर्ने सूचना पुगेको बताइएको छ ।
