
फागुन १ । नेपाल कम्युनिस्ट पार्टी नेकपाका अध्यक्ष पुष्पकमल दाहाल ‘प्रचण्ड’ले संघीय लोकतान्त्रिक गणतन्त्रमाथि प्रतिक्रान्तिकारी सोचसहित हमला भएको बताएका छन् ।
शनिबार काठमाडौँमा गंगा कार्की विश्वको ‘दुसाध्य जनयुद्ध’ पुस्तक सार्वजनिक गर्दै अध्यक्ष दाहालले संघीय लोकतान्त्रिक गणतन्त्रमाथि पुरानो प्रतिक्रान्तिकारी तथा प्रतिक्रियावादी सोचसहित हमला भएको बताए । उनले ठूलो बलिदानी पछि प्राप्त उपलब्धि संकटमा परेकाले एकताबद्ध भएर त्यसको रक्षा गर्नुपर्ने उल्लेख गरे ।
मार्क्सवादलाई धर्मशास्त्रजस्तो बनाइएका कारण विश्व कम्युनिस्ट आन्दोलनले ठूलो क्षति व्यहोरेको आफ्नो ठम्याइरहेको उनको भनाइ थियो । अध्यक्ष प्रचण्डले ‘जनयुद्ध’लाई शान्तिमा रूपान्तरण नगरेको भए आफूहरुको जित नहुने बताए । पेरु, श्रीलंकालगायतका देशहरुको जस्तो युद्ध नहोस् भनी क्षेत्रीय, राष्ट्रिय, अन्तर्राष्ट्रिय र पार्टीभित्रको परिस्थिति अध्ययन गरी जनयुद्धलाई शान्तिमा रूपान्तरण गरेको स्मरण पनि उनले गरे ।
जनयुद्ध शान्तिमा रूपान्तरण हुँदै अहिले संघीय लोकतान्त्रिक गणतन् मा आइपुगेको भन्दै उनले सोही उपलब्धिमाथि भएको प्रहारविरुद्ध एकजुट हुन सबैलाई आह्वान गरे ।