माघ १० । चितवनमा मध्यवर्ती क्षेत्रमा बसोबास गर्ने समुदायलाई लक्षित गर्दे बाघ, गैंडा संरक्षण पाठशाला शुरु गरिएको छ । चितवन राष्ट्रिय निकुञ्ज र मध्यवर्तीमा रहेका बाघ गैंडालगायत बन्यजन्तु संरक्षणका साथ मानवीय क्षति कम गर्न शुक्रबारदेखि बाघ, गैंडा संरक्षण र सचेतना पाठशाला शुरु गरिएको हो ।
राप्ती नदी तटीय क्षेत्र सरसफाई अभियान मध्यवर्ती क्षेत्र चितवनको आयोजनामा बेलशहर मध्यवर्ती सामुदायिक वन, गंगानगरमा ३२ वटा संस्करणको लागि पाठशालाको सुरु गरिएको संरक्षणकर्मी एवम संस्थाका अध्यक्ष अपिल घिमिरेले जानकारी दिए ।
मध्यवर्ती क्षेत्रमा बसोवास गर्ने र नदी र जंगलमा आश्रित समुदायमा बढी मानवीय क्षति भएकोले यसको न्यूनिकरण गर्न पाठशाला शुरु गरिएको घिमिरेको भनाइ छ । उनका अनुसार जंगलमा घाँस दाउरा गर्न जांँदा वन्यजन्तुको आक्रमणबाट कसरी बच्ने र सावधानी अपनाउने र दुर्लभ वन्यजन्तुको संरक्षणका बिषयमा कार्यक्रम केन्द्रित रहनेछ ।
फरक फरक समय पारेर गरिने पाठशालाको ३२ दिननै यससम्बन्धी विषय विज्ञ र संरक्षणकर्मीहरुले लक्षित वर्गलाई अभिमुखीकरण गर्ने बताइएको छ ।
राष्ट्रिय प्रकृति संरक्षण कोष सौराहा चितवनका प्रमुख डा बाबुराम लामिछानेले बाघ गैंडाको स्वभाव तथा जंगल जाँदा ख्याल गर्नुपर्ने कुराहरुको जानकारी गराएका थिए ।
सो क्रममा लामिछानेले बाघ र गैंडाले कस्तो अवस्थामा आक्रमण गर्छ र त्यसबाट कसरी बच्न सकिन्छ भन्नेबारेमा शिक्षा सँगै यससम्बन्धि पुस्तकसमेत वितरण गरेका थिए । मानव र वन्यजन्तुको द्वन्द्व कम गर्दै मानवीय क्षति कम गरी वन्यजन्तु संरक्षण बिषयमा उनले सहभागीलाई प्रशिक्षण दिएका थिए ।
बाघको मुख्य बासस्थान बेत बाँस रहेको र बेलसहर सामुदायिक वनले ती बाँसहरु हुर्काएर संरक्षण गरिरहेको वनका अध्यक्ष चेतबहादुर रानाभाटले जानकारी दिए । यस्ता सामुदायिक वनमा विशेष गरी विपन्न वर्ग घांँस दाउरा गर्न जाने भएकोले यस किसिमिको पाठशालाले मानवीय क्षति कम हुने उनले विश्वास व्यक्त गरे ।
पाठशालाले स्थानीयलाई संरक्षणमा लाग्न साथै वन्यजन्तुबाट जोगिन सहयोग पुग्ने रानाभाटले बताए ।
