माघ ६ । मेडिकल शिक्षामा नेपालबाहिर पीजी स्नातकोत्तर गरेर आएका फिजिसियनका चिकित्सकहरुको नेपालमा क्लिनिकल ट्रेनिङ गराउने प्रक्रिया सुरु गरिएको छ ।
पीजी उत्तीर्ण भएर पनि कोभिड–१९ का कारण क्लिनिकल तालिम लिन रोकिएका विद्यार्थीलाई तालिम प्रदान गर्न चिकित्सा शिक्षा आयोग र नेपाल मेडिकल काउन्सिलको पहलमा प्रक्रिया सुरु गरिएको हो ।
काउन्सिलले सोमबार सूचना जारी गर्दै सम्बन्धित विश्वविद्यालसँगको सहकार्यमा उनीहरुलाई वैधानिक स्वास्थ्य संस्थामा हुने तालिममा सहभागी हुन सूचित गरेको छ ।
नेपाल मेडिकल काउन्सिलका कार्यकारी सदस्य डा। कालुसिंह खत्रीका अनुसार कोभिड–१९ का कारण रोकिएको मेडिकल शिक्षाको विशेषज्ञ तहको अध्ययन र अभ्यास अगाडि बढोस् भन्ने उद्देश्यले यस्तो निर्णय गरिएको हो । यो निर्णय कोरोना महामारी अवधिभर मात्रै लागु हुने सूचनामा उल्लेख छ ।
