पौष २७ । ऊर्जा, जलस्रोत तथा सिँचाइमन्त्री टोपबहादुर रायमाझीले तनहुँको ऋषिङ गाउँपालिका–१, झापुटारस्थित निर्माणाधीन तनहुँ जलविद्युत् आयोजनाको सोमबार स्थलगत अवलोकन तथा निरीक्षण गरेका छन् ।
सो अवसरमा तनहुँ हाइड्रोपावर कम्पनीका प्रबन्ध निर्देशक प्रदीप थिके र आयोजना प्रमुख अच्युत घिमिरेले आयोजनाको हालसम्मको प्रगति र गतिविधिबारे मन्त्री रायमाझीलाई जानकारी गराए ।
आयोजनाको प्याकेज–२ अन्तर्गत् सिनो हाइड्रो कम्पनीले निर्माण गरिरहेको विद्युत्गृह, मुख्य प्रवेश सुरुङ, सर्ज ट्रयाक जाने सुरुङ, बाँधस्थल जाने सुरुङ खन्ने कार्य जारी छ ।
आयोजना प्रमुख घिमिरेका अनुसार प्याकेज–२ अन्तर्गत् सिनोले क्याम्प, ब्याचिङ तथा क्रसिङ प्लान्ट, ल्याब, क्लिनिक, स्टोर, उपकरणकक्ष आदि पूर्वाधारको स्थापना, केबल सुरुङ, विद्युत्गृहको पाइलट सुरुङ, पहुँच सडक खन्ने कार्य सम्पन्न गरेको छ ।
प्याकेज–३ अन्तर्गत् प्रसारणलाइन निर्माणका कामबारेमा समेत मन्त्री रायमाझीलाई जानकारी गराइएको छ । केइसी इन्टरनेसनले प्रसारणलाइन निर्माणका लागि काम गरिरहेको छ । त्यस्तै, प्याकेज एक निर्माणका लागि नियुक्त ठेकेदारसँगको ठेक्का रद्द गरी पुनः दुईपटक बोलपत्र आह्वान गर्नुपरेकाले निर्माणमा ढिलाइ भएको बताइएको छ ।
निरीक्षणका क्रममा गण्डकी प्रदेशका आर्थिक मामिला तथा योजनामन्त्री किरण गुरुङ, राष्ट्रियसभा सदस्य भगवती न्यौपाने र विघटित प्रतिनिधिसभा सदस्य कृष्णकुमार श्रेष्ठलगायतको सहभागिता थियो ।
आयोजनाका लागि १४० मिटर बाँध, एक हजार १६२ मिटर र ७४ मिटरको मुख्य सुरुङ तथा ८९ मिटर लम्बाइ, २२ मिटर चौडाइ र ४४ मिटर उचाइ भएको भूमिगत विद्यृतगृह निर्माण गरिनेछ । खुद उचाइ १२१ मिटर रहने आयोजनाबाट सुक्खायाममा १७८।९० मेगावाट र वर्षायाममा ३२३।६८ मेगावाट ऊर्जा उत्पादन हुनेछ ।
आयोजनाको कुल लागत ५०५ मिलियन अमेरिकी डलर प्रसारणलाइन, ग्रामीण विद्युतीकरण तथा निर्माण अवधिको ब्याजसमेत० रहेको छ । जाइकाले दोस्रो प्याकेजअन्तर्गत्का कामका लागि रु १८४ मिलियन डलर बेहोर्ने छ । रासस