पौष २६ । महानगरीय ट्राफिक प्रहरी महाशाखाले ट्राफिक प्रहरीको अनुपस्थितिमा हुने ट्राफिक नियम उल्लंघन गर्ने सवारी साधनलाई निगरानी गरी कारबाही र सचेतना गर्न ‘ट्राफिक सर्भिलेन्स भेइकल’ आजदेखि परिचालन गरेको छ ।
उपत्यकाको व्यस्त सडकहरुमा हुने सवारी चापलाई व्यवस्थापन गर्न र फराकिला सडकमा हुने तीव्र गति नियन्त्रण गर्न उपयोगी हुनेगरी महाशाखाले परिचालन गरेको हो ।
महाशाखाका प्रमुख एसएसपी जनक भट्टराईले माइक्रोबस आकारको सर्भिलेन्स भ्यानको छतमा जडित सीसीटीभी क्यामेराले २०० मिटरसम्मको दृश्यलाइ कैद गर्न सक्ने जानकारी दिए । पिक आवरमा सवारी चाप जाम हुने क्षेत्र र धेरै मात्रामा ट्राफिक नियम उल्लंघन हुने क्षेत्रमा भ्यानले बढी निगरानी गर्ने पनि उनले बताए ।
भ्यानमा खटिने पाँच ट्राफिक प्रहरीले दैनिक सवारी आवागमनको नियमन गर्ने र सडक गतिविधिलाई भिडियो तथा फोटोमा कैद गर्न मिल्ने प्रविधि जडान गरेको छ । यसले ट्राफिक व्यवस्थापनमा महत्त्वपूर्ण सहयोग गर्ने र आमचालकहरुलाई प्रमाणसहित कारबाही गर्न र थप सचेत जगाउन सहयोगी हुने अपेक्षा रहेको महाशाखाले जनाएको छ ।